B-liðið hjá dreingjum 10 hevur sýnt stóra framgongd í vetur. Leygardagin vunnu teir mini-steypakapping, sum varð spæld í Vestmanna

So løgið kann tað vera. Í fyrru semifinaluni ímoti Neistanum spældu kyndilskvinnur ein frálíkan dyst, men taptu at enda 27-21. Tað kendist ikki rættvíst. Í kvøld spældu kyndilskvinnur langt frá líka væl, men taptu einans 25-20. Tíbetur batnaði spælið í seinna hálvleiki, tí tað var ikki gott í fyrra hálveiki. Nógv varð rótað, og alt ov ofta varð roynt at trýsta bóltin inn á strikuna, hóast Anja als ikki var frí. Hetta hendir ofta, tá skjúttarnir ikki taka ábyrgd. Hálvleiksstøðan var 14-6. Í seinna hálvleiki fekst meira ferð á spælið, og hetta hevði við sær fleiri góð álop. Randi, Turið og Guðrið bjóðaðu av og skutu, og tað gav teimum fýra mál í part. Vivian hevði eisini fleiri bjargingar. Barbara Brauer hjá Neistanum var ikki á vøllinum seinasta korterið. Hetta broytti dystin, tí Neistin er ikki sama lið uttan hana. Kyndil vann seinastu løtuna ruddiliga. Eyðsýnt er, at Barbara Braur er tann stóra avbjóðingin hjá øllum hinum liðunum í deildini. Skorar hon ikki sjálv, dregur hon 2-3 spælarar at sær, og so verða aðrar fríar. Enn sum áður hugsa venjarar um, hvussu Neistin við Barbaru Brauer á liðnum kann knógvast. Fyrr ella seinni fer tað at eydnast

Kyndil vinnur stórsigur á Hálsi! Soleiðis skal tað gerast! Kyndilsmenn mundu vinna sær stóra virðing millum hini liðini, tá teir í gjár góvu StÍF ein rættiligan vals í landskappingini. 27-17 vísti máltalvan, tá liðugt var, og sigurin var fult uppiborin. Tá 13 minuttir vóru farnir av fyrra hálvleiki, var støðan 7-7. Tá bendi alt á ein javnan dyst, men so brádliga stongdu teir grønu verjuna, og StÍF skoraði ikki í 13 minuttir. So varð støðan 11-7, og hálvleiksstøðan var 12-9. Finnur brendi ikki eitt einasta skot í fyrra hálveiki og fekk seks mál. Sveinur hjá strandingum rakti sjáldan málið, og tað kom Kyndli væl við. Í seinna hálvleiki dró Kyndil bara frá StÍF, og fleiri mans brillieraðu. Ludvík skoraði sjey og Andrias fimm, og annars var talan um liðavrik í álopi og verju. Erlendur er ein brandur í málinum. Verður bara betri, sum kappingin líður. Vit eru væl og virðiliga við í finalustríðnum, og í finaluna ætla vit!  

Kvinnudysturin í gjár millum Kyndil og StÍF var ikki av teimum best spældu. Kyndilsliðið fekk ongantíð spælið at hanga saman, og onki serligt gekst við málskjótingini. Einans 18 mál skoraði liðið. Tað gjørdi StÍF eisini, og tí fingu liðini eitt stig í part. StÍF kundi farið við øllum, tá Paula Høgnesen at enda skeyt brotskast. Men hon brendi. Júst í teirri løtuni fegnaðust kyndilsfólk, tí við brenda brotskastinum vann Kyndil í roynd og veru eitt stig. Dystin skuldu okkara kvinnur annars havt vunnið langt frammanundan, men spælið var ikki nóg gott, og tí slapp Kyndil ongantíð frá StÍF. Heppið var, at Stjørnan og VB spældu javnt, tí á tann hátt gjørdist stigamissurin ikki so tungur. StÍF stríddist fyri sínum møguleika og fekk uppiborið annað stigið. Nú er Neistin á skránni mikukvøldið. Tá røkka vit hæddunum frá fyrru hálvfinaluni, tá spælið var frálíkt!

Kyndilskvinnur taptu 27-21 ímóti Neistanum í kvøld í fyrra hálvfinaluni í Coca Cola-kappingini, men tær spældu ein fínan dyst. Í fyrra hálvleiki vóru tær aftanfyri 8-4, men komu so afturíaftur og javnaðu til 8-8. Fyri hálvleikssteðgin fóru tær framum og vóru á odda 12-10, tá hálvleikur var. Javnt gekk á fyrstu 10 minuttirnar í seinna hálvleiki, men so dró Neistin nakað frá. Kyndil fylgdi nøkulunda við, men orkan gekk spakuliga undan at enda, og munurin gjørdist tí seks mál - heldur enn kanska trý. Okkara kvinnur vóru stak uppsettar og ídnar í dag. Áskoðararnir hava ikki verið betri hetta kappingarárið. Lív var allatíðina í. Ein kensla av vón um nakað stórt tykist búgva í fólki í løtuni. Kyndil nærkast Neistanum í bestu kvinnudeildini, og nú er at halda fram við góðu avrikunum. StÍF skal sunnudagin hava somu sannførandi mótstøðu, sum Neistin fekk í dag. Ongin má slaka, og tvey stig skulu vinnast!

NÝTT: Tomma Petersen mátti av vølli í gjár mitt í dystinum við skaða. Kanningar vísa, at handliðurin er brotin og má í gips í seks vikur. Sera, sera hamiligt hjá Tommu og Kyndli. Systir Tommu, Vivian, er júst komin í Kyndil og avloysti í málinum í gjár. Tað fer hon eisini at gera næstu dystirnar. Vælkomin í felagið, Vivian!  

Skuldi tað eydnast í Vági? Tað var stóri spurningurin undan dystinum hjá kvinnunum ímóti VB í dag, og tað eydnaðist ruddiliga. 19-14 vunnu okkara kvinnur á vágskvinnum, og serliga verjan og Tomma í málinum vóru í essinum. Simona verður bara betri og betri. Hon skoraði sjey ferðir í dag. Hálvleiksstøðan var 7-4. Kyndilskvinnur hava seinastu tríggjar dystirnar vunnið á VÍF/Tjaldri, Stjørnuni og VB. Allir sigrarnir eru komnir í hús, síðan ungar sum eldri á liðnum gjørdu av at standa saman, stríðast fyri liði og felag og seta kós ímóti FM-finaluni. Nú er at halda fast og venja sum harðast fyri at røkka finaluni. Hóskvøldið er Neistin á skránni í fyrru semifinaluni í Coca Cola-kappingini. Um Stjørnan næstan kann koppa Neistanum, so kann Kyndil eisini, so spenningurin er í hæddini eisini í steypakappingini. Koyrið á, allar samlar!

Tað kundi verið uppaftur betri, men tað kundi eisini verið nógv verri hjá monnunum í Kollafirði í dag. Eftir steypakappingardystin mitt í vikuni var spennandi at síggja, hvussu Kyndil fór at koma frá byrjan, og byrjanin var heilt í lagi. 7-3 var KÍF á odda einaferð. Tá sá eitt sindur møtimikið út, men hálvleiksstøðan var einans 14-13 til kollfirðingar. Í seinna hálvleiki komu okkara menn á odda eitt skifti, og tá 8-10 minuttir vóru eftir, var javnt 21-21, men so fór KÍF trý mál framum, m.a. tí kollfirðingar við einum manni færri skoraðu tvær ferðir, meðan okkara ikki skoraðu. Endaliga úrslitið gjørdist 31-28 til KÍF. Okkara menn spældu ein fínan dyst í dag. Teir reistu seg ruddiliga eftir ódnarveðrið mikudagin, Finnur vísti aftur klassan við níggju málum, og nú er uppgávan greið alla næstu viku - at venja hart fram ímóti einum sigri á StÍF sunnudagin

Oy, oy, oy! Annað kann ikki sigast um byrjanina hjá kollfirðingum í steypakappingardystinum ímóti Kyndli í Kollafirði í kvøld. Kollfirðingar vóru frá fyrsta minutti skjótari, sterkari og skarpari. Fyrst var 7-0. So var støðan 10-1, og Bárður Johannensen tók time-out og gav kyndilsmonnum ein rungandi vals. Við støðuna 13-4 linkaði KÍF-liðið, og okkara menn fótaðu sær. Hálvleiksstøðan líktist eini vanligari hálvleiksstøðu, 16-12. Nú hevði Kyndil eina vón, og spælt varð fyri vónini, men trupult var at syfta KÍF. Tó var støðan, tá 10 minuttir vóru eftir, 26-22, men ongantíð eydnaðist at minka avgerandi um munin og fáa fjáltur á kollfirðingar. At enda sleptu okkara menn endanum, og úrslitið gjørdist 34-26. Onki lið hevur spælt betri í ár enn KÍF fyrstu 15 minuttirnar í kvøld. Kyndilsmenn lærdu nógv um at vera til reiðar frá fyrsta bríksli, og tað var gott, tí sunnudagin spæla KÍF og Kyndil aftur í Kollafirði í landskappingini. Tá fara vit eftir tveimum stigum við eini krútsterkari verju og einum tolnum álopi! Finnur skeyt 9 mál í kvøld.  

Leygarkvøldið 23. februar skipar Kyndil triðja árið á rað fyri harmonikudansi í ítróttarhøllini á Hálsi. Tiltakið verður skipað sum felagssangur, ið byrjar kl. 22.00, og so dansur, ið byrjar løtu seinni

Ongin ivi var um úrslitið, tá besta og næstaliðið hjá kyndilskvinnum spældu steypakappingardyst í høllini á Hálsi í kvøld. Besta kvinnuliðið vann 44-18 og er tí komið víðari í Coca Cola-kappingini. Onkrir spælarar á besta liðnum, eitt nú Anja Heinadóttir og Jórun Ludvig, hvíldu seg eftir dystin ímóti Stjørnuni í gjár, men hetta forðaði ikki fyri, at Sunset-liðið vann stórsigur. Hvørjum kyndilskvinnur skulu spæla ímóti í hálvfinaluni, er ikki greitt enn.